आगामी फागुन २२ गते (मार्च ५, २०२६) हुने आम निर्वाचनको सरगर्मी बढिरहेका बेला नेपालको राजनीतिमा ठूलो हलचल पैदा भएको छ। अन्तरिम सरकारका ऊर्जा मन्त्री तथा नेपालको ‘लोडसेडिङ अन्त्यका नायक’ कुलमान घिसिङले आज आफ्नो पदबाट राजीनामा दिएका छन्।
प्रधानमन्त्री सुशीला कार्कीले “चुनाव लड्ने कुनै पनि मन्त्रीले तत्काल राजीनामा दिनुपर्ने” कडा नीति लागू गरेसँगै घिसिङले आज बिहान सिंहदरबार पुगेर राजीनामा बुझाएका हुन्। घिसिङसँगै अन्य दुई मन्त्रीहरू बबलु गुप्ता र जगदीश खरेलले पनि राजीनामा दिएका छन्।
रास्वपाको उपसभापतिमा कुलमानको इन्ट्री
विश्वस्त स्रोतका अनुसार कुलमान घिसिङ राष्ट्रिय स्वतन्त्र पार्टी (रास्वपा) मा प्रवेश गरिसकेका छन् र उनलाई पार्टीको उपसभापति पदको जिम्मेवारी दिइएको छ। उनले काठमाडौं वा आफ्नो गृहजिल्ला रामेछापमध्ये एक ठाउँबाट चुनाव लड्ने तयारी गरेका छन्। यद्यपि, चितवनका रास्वपा समर्थकहरूले उनलाई चितवन क्षेत्र नं. २ वा ३ बाट चुनाव लड्न आग्रह गरिरहेका छन्।
बालेन र रास्वपाबीचको ‘महागठबन्धन’ चर्चा
काठमाडौंका मेयर बालेन शाह र रास्वपाबीच चुनावी तालमेल हुने चर्चाले देशभरका युवा मतदातामा उत्साह थपेको छ। सौराहा र आसपासका क्षेत्रमा पनि यसको प्रभाव देखिन थालेको छ। युवाहरूले यसलाई “पुरानो पुस्ता विरुद्ध नयाँ सोचको लडाइँ” भन्दै सामाजिक सञ्जालमा अभियान सुरु गरिसकेका छन्।
के भन्छन् विज्ञ?
राजनीतिक विश्लेषकहरूका अनुसार कुलमानको राजीनामा र राजनीतिमा औपचारिक प्रवेशले स्थापित ठूला दलहरू—नेपाली कांग्रेस र एमालेलाई ठूलो धक्का पुग्ने देखिन्छ। विकास र सुशासनको प्रतिक बनेका घिसिङको चुनावी मैदानमा आगमनले मतदाताको मनोविज्ञानमा ठूलो परिवर्तन ल्याउन सक्छ।
निर्वाचन आयोगले आजैदेखि आचारसंहितामा थप कडाइ गरेको छ भने सुरक्षा निकायलाई ‘हाई अलर्ट’ मा राखिएको छ।
